ಖಶೋಗ್ಗಿ ಕೊಲೆ; ಯುವರಾಜನ ಕೈವಾಡ?

Murderer murder; Have a prince?

17-11-2018 182

ಸೌದಿ ಅರೇಬಿಯದ ಯುವರಾಜನೇ ಪತ್ರಕರ್ತ ಜಮಾಲ್ ಖಶೋಗ್ಗಿ ಹತ್ಯೆ ಮಾಡಿಸಿದ್ದು ಅನ್ನುವುದು ಅಮೆರಿಕದ ಗೂಢಚರ್ಯ ಸಂಸ್ಥೆ ಸಿಐಎ ನಿಲುವು. ಸೌದಿಯ ಯುವರಾಜ ಮೊಹಮದ್ ಬಿನ್ ಸಲ್ಮಾನ್ ಅಣತಿಯಿಲ್ಲದೆ ಇಂಥ ಒಂದು ಹತ್ಯೆ ನಡೆಯಲು ಸಾಧ್ಯವಿಲ್ಲ ಎಂದಿರುವ ಸೆಂಟ್ರಲ್ ಇಂಟೆಲಿಜೆನ್ಸ್ ಏಜೆನ್ಸಿ(C.I.A) ಆ ಬಗ್ಗೆ ಸಾಕಷ್ಟು ಸುಳಿವುಗಳನ್ನೂ ಕಲೆಹಾಕಿದೆ. 

ಪತ್ರಕರ್ತ ಜಮಾಲ್ ಖಶೋಗ್ಗಿ ಹತ್ಯೆಗೆ ಮೊದಲು ಮತ್ತು ನಂತರ ಸೌದಿ ಯುವರಾಜ ಹಾಗೂ ಆತನ ಆಪ್ತರ ಫೋನ್ ಕರೆಗಳು ಇದಕ್ಕೆ ಆಧಾರವಾಗಿವೆ ಎಂದು ಸಿಐಎ ಹೇಳಿದೆ. ಈ ಮಾಹಿತಿಯನ್ನು ಅಮೆರಿಕ ಸರ್ಕಾರಕ್ಕೆ ರವಾನಿಸಿರುವ ಸಿಐಎ, ಖಶೋಗ್ಗಿ ಕೊಲೆ ನಂತರ ‘Kill Team’ ಸದಸ್ಯನೊಬ್ಬ, ಸೌದಿ ಯುವರಾಜನ ಆಪ್ತರಿಗೆ ಕರೆ ಮಾಡಿ ‘ಕೆಲಸ ಆಯಿತು ಎಂದು ನಿಮ್ಮ ಬಾಸ್ಗೆ ತಿಳಿಸಿ’ ಎಂದು ಹೇಳಿದ್ದ ಎಂಬ ಮಾಹಿತಿ ನೀಡಿದೆ.

ಆದರೆ, ಈ ಎಲ್ಲ ಮಾಹಿತಿಗಳು ಖಶೋಗ್ಗಿ ಕೊಲೆಗೆ ಸೌದಿಯ ಯುವರಾಜನೇ ನೇರವಾಗಿ ಕಾರಣ ಅನ್ನುವುದಕ್ಕೆ ಅಧಿಕೃತ ಪುರಾವೆಯೇನೂ ಅಲ್ಲ ಎಂದು ಸಿಐಎ ತಿಳಿಸಿದೆ. ಪತ್ರಕರ್ತ ಜಮಾಲ್ ಖಶೋಗ್ಗಿ ತಮ್ಮ ವಿವಾಹಕ್ಕೆ ಸಂಬಂಧಿಸಿದಂತೆ ಅಗತ್ಯವಿರುವ ದಾಖಲೆ ಪಡೆಯುವ ಸಲುವಾಗಿ ಇದೇ ಅಕ್ಟೋಬರ್ 2 ರಂದು, ಟರ್ಕಿ ದೇಶದ ರಾಜಧಾನಿ ಇಸ್ತಾನ್ಬುಲ್ ನಲ್ಲಿರುವ ಸೌದಿ ಅರೇಬಿಯದ ರಾಯಭಾರ ಕಚೇರಿಗೆ ತೆರಳಿದ್ದರು. ಆ ಸಂದರ್ಭದಲ್ಲಿ ಜಮಾಲ್ ಖಶೋಗ್ಗಿಯನ್ನು ಹತ್ಯೆಮಾಡಿ, ಶವ ನಾಶಮಾಡಲಾಗಿತ್ತು. 

ಸೌದಿ ಅರೇಬಿಯದ ಪತ್ರಕರ್ತ 59 ವರ್ಷ ವಯಸ್ಸಿನ ಜಮಾಲ್ ಖಶೋಗ್ಗಿ, ವಾಷಿಂಗ್ಟನ್ ಪೋಸ್ಟ್ ಪತ್ರಿಕೆಗಾಗಿ ಬರೆಯುತ್ತಿದ್ದರು. ಅದಕ್ಕಿಂತ ಮೊದಲು, ಅಲ್-ಅರಬ್ ನ್ಯೂಸ್ ಚಾನಲ್ ಮುಖ್ಯಸ್ಥರಾಗಿಯೂ ಕೆಲಸ ಮಾಡಿದ್ದ ಖಶೋಗ್ಗಿ, ಇತ್ತೀಚಿನ ವರ್ಷಗಳಲ್ಲಿ ಸೌದಿ ಅರೇಬಿಯ ಸರ್ಕಾರದ ಟೀಕಾಕಾರರಾಗಿದ್ದರು.



ಒಂದು ಕಮೆಂಟನ್ನು ಹಾಕಿ

ಟಾಪ್ ಪ್ರತಿಕ್ರಿಯೆಗಳು


ಇಲ್ಲ ಪ್ರತಿಕ್ರಿಯೆಗಳು ಕಂಡುಬಂದಿಲ್ಲ