ಕಾಂಗ್ರೆಸ್ ವಿರುದ್ಧ ಜೆಡಿಎಸ್ 15 ಅಂಶಗಳ ಚಾರ್ಜ್ ಶೀಟ್

The JDS 15-point charge sheet against the Congress

30-04-2018

ರಾಜ್ಯದಲ್ಲಿ ಇತ್ತೀಚೆಗೆ ಕಾಂಗ್ರೆಸ್ ಪಕ್ಷ ಜೆಡಿಎಸ್ ವಿರುದ್ಧ ಕಟುವಾದ ಶಬ್ಧಗಳನ್ನು ಬಳಸಿ ಟೀಕಿಸುತ್ತಿದೆ. ಸಿಎಂ ಸಿದ್ದರಾಮಯ್ಯ ಅವರ ಆದಿಯಾಗಿ ಅದರಲ್ಲಿನ ಎಲ್ಲ ನಾಯಕರು ವಾಚಾಳಿತನ ಪ್ರದರ್ಶಿಸುತ್ತಿದ್ದಾರೆ. ರಾಜ್ಯ ಅಭಿವೃದ್ಧಿಯ ಚರ್ಚೆಯನ್ನು ಪಕ್ಕಕ್ಕಿಟ್ಟು ಇತರರ ಮೇಲೆ ಪೊಳ್ಳು ಆರೋಪ ಮಾಡುವುದನ್ನು ರೂಢಿಸಿಕೊಂಡಿದ್ದಾರೆ. ಹೀಗೆ ಆರೋಪ ಮಾಡುವಾಗ ತನ್ನ ಮಗ್ಗುಲಲ್ಲೇ ನಾರುತ್ತಿರುವ ತಪ್ಪುಗಳನ್ನು ಕಾಂಗ್ರೆಸ್ ಮರೆಯುತ್ತಿದೆ. ಅದನ್ನು ನೆನಪಿಸಲಿ ಮತ್ತು ಕಾಂಗ್ರೆಸ್ ಪಕ್ಷದ ಪ್ರಮಾದಗಳನ್ನು ನಾಡಿನ ಜನರಿಗೆ ತಿಳಿಸಲು ಈ ಚಾರ್ಜ್ ಶೀಟ್ ಅನ್ನು ಜನತಾ ನ್ಯಾಯಾಲಯದ ಅವಗಹನೆಗೆ ಜಾತ್ಯತೀತ ಜನತಾದಳ ಸಲ್ಲಿಸುತ್ತಿದೆ. ಜನತೆ ಇದರ ನ್ಯಾಯ ಪರಾಮರ್ಶೆ ಮಾಡಿ ಕಾಂಗ್ರೆಸ್ ಪಕ್ಷಕ್ಕೆ ತಕ್ಕ ಶಿಕ್ಷೆ ವಿಧಿಸಬೇಕು.

ಕಾಂಗ್ರೆಸ್ ವಿರುದ್ಧದ ಚಾರ್ಜ್ ಶೀಟ್ ಅನ್ನು ಅದರ ಡೊಂಗಿ ಜಾತ್ಯತೀತತೆಯ ಮೂಲಕವೇ ತೆರೆಯಲು ಜೆಡಿಎಸ್ ಬಯಸುತ್ತದೆ. ಜಾತ್ಯತೀತತೆಯನ್ನು ತನ್ನ ಮನೆ ಸ್ವತ್ತು, ತಾನೇ ಅದರ ರಕ್ಷಕ, ಪ್ರತಿಪಾದಕ ಎಂದು ಬೊಬ್ಬೆ ಹೊಡೆಯುವ ಕಾಂಗ್ರೆಸ್ ಜಾತ್ಯತೀತತೆ ಹೆಸರಲ್ಲಿ ಹಲವು ತಪ್ಪುಗಳನ್ನೆಸಗಿದೆ.

1.ಲಿಂಗಾಯತ ವೀರಶೈವ ಸಮುದಾಯವನ್ನು ಒಡೆದಿದ್ದು ಜಾತ್ಯತೀತತೆ ತತ್ವದ ಮೇಲಾ?

ಲಿಂಗಾಯತ-ವೀರಶೈವ ಎಂಬ ಜಾತಿ ಒಟ್ಟಾಗಿರುವವರೆಗೆ ಪಕ್ಷಕ್ಕೆ ಉಳಿಗಾಲವಿಲ್ಲ ಎಂಬುದನ್ನು ಸ್ಪಷ್ಟವಾಗಿ ಅರಿತಿರುವ ಕಾಂಗ್ರೆಸ್ ಆ ಸಮುದಾಯವನ್ನು ವಿಭಜಿಸಲು ಕೇಂದ್ರ ಸರ್ಕಾರಕ್ಕೆ ಶಿಫಾರಸು ಮಾಡಿದೆ. ಸಮುದಾಯವೊಂದು ತಾನು ಒಂದು ಧರ್ಮದಲ್ಲಿ ಹೊಂದಿರುವ ಭಾವನ್ಮಾತ್ಮಕ ನಂಟನ್ನು ಲೆಕ್ಕಿಸದೇ ವಿಭಜಿಸಲು ಕೈ ಹಾಕಿದ ಕಾಂಗ್ರೆಸ್ ಆ ಕುಕೃತ್ಯವನ್ನು ಜಾತ್ಯತೀತ ನೆಲೆಗಟ್ಟಿನಲ್ಲಿ ಮಾಡಿತೇ? ಸಮುದಾಯವನ್ನು ವಿಭಜಿಸಿದ್ದೂ ಅಲ್ಲದೆ, ವಿಭಜನೆಗೆ ಆ ಸಮುದಾಯವನ್ನೇ ಹೊಣೆಗಾರನನ್ನಾಗಿಸಿತು. "ಲಿಂಗಾಯತರು ಪ್ರತ್ಯೇಕತೆ ಬಯಸಿದರು. ಅದಕ್ಕೇ ಪ್ರತ್ಯೇಕಿಸಿದ್ದೇವೆ" ಎಂದು ಕಾಂಗ್ರೆಸ್ ನುಣುಚಿಕೊಂಡಿತು. ಲಿಂಗಾಯತರು ಪ್ರತ್ಯೇಕತೆ ಬಯಸಿದ್ದು ನಿಜವೇ ಆಗಿದ್ದರೂ ಪ್ರತ್ಯೇಕಗೊಳಿಸಲು ಕಾಂಗ್ರೆಸ್ ಸರ್ಕಾರ ಆತುರ ಮಾಡಿದ್ದೇಕೆ? ಪ್ರತ್ಯೇಕತೆಯಲ್ಲಿ ಸರ್ಕಾರದ ಪಾತ್ರವಿಲ್ಲವೇ? ಹಾಗಿದ್ದರೇ ಸರ್ಕಾರದ ಭಾಗವೇ ಆಗಿದ್ದ ಸಚಿವ ಎಂ.ಬಿ ಪಾಟೀಲ್, ವಿನಯ್ ಕುಲಕರ್ಣಿ ಅವರನ್ನು ಪ್ರತ್ಯೇಕಗೊಳಿಸುವ ಕಾರ್ಯಕ್ಕೆ ಕಾಂಗ್ರೆಸ್ ನಿಯೋಜಿಸಿದ್ದೇಕೆ? ಧರ್ಮವನ್ನು ಪ್ರತ್ಯೇಕಗೊಳಿಸುವ ಉತ್ಸಾಹದಲ್ಲಿದ್ದ ಅವರಿಂದ ಕಾಂಗ್ರೆಸ್ ರಾಜೀನಾಮೆ ಪಡೆದಿದ್ದರೆ ಲಿಂಗಾಯತರ ವಿಭಜನೆಗೂ ಸರ್ಕಾರಕ್ಕೂ ಸಂಬಂಧವಿಲ್ಲ ಎಂದು ಹೇಳಬಹುದಿತ್ತು. ಅದಿರಲಿ, ಲಿಂಗಾಯತ ಧರ್ಮ ಮಾಡುವ ವಿಚಾರದಲ್ಲಿ ಸರ್ಕಾರ ಯಾರೊಂದಿಗೆ ಚರ್ಚೆ ಮಾಡಿದೆ? ಮಠಾದೀಶರನ್ನು ಒಂದು ವೇದಿಕೆಗೆ ಕರೆದು ಚರ್ಚೆ ಮಾಡಿತೇ? ಇತಿಹಾಸಜ್ಞರೊಂದಿಗೆ ಮಾತನಾಡಿತೇ? ಇಲ್ಲವಲ್ಲ? ಆತುರಾತುರವಾಗಿ ವರದಿ ಪಡೆದು, ವರದಿ ಬಗ್ಗೆ ನ್ಯಾಯಾಲಯದಲ್ಲಿ ಆಕ್ಷೇಪಣೆ ಇದ್ದರೂ, ಅಂಗೀಕರಿಸಿದ್ದೂ ಅಲ್ಲದೇ ಪ್ರತ್ಯೇಕತೆಗೆ ಶಿಫಾರಸು ಮಾಡಿದ್ದು ರಾಜಕಾರಣವಲ್ಲವೇ? ಲಿಂಗಾಯತ-ವೀರಶೈವರನ್ನು ಒಡೆದಿದ್ದು ಕುತ್ಸಿತ ಬುದ್ಧಿಯಲ್ಲವೇ?  ಇದೇನಾ ಜಾತ್ಯತೀತತೆ?

2. ಒಡೆಯುವುದು, ಓಲೈಸುವುದೇ ಜಾತ್ಯತೀತತೆಯೇ?

ಕಾಂಗ್ರೆಸ್ ಇತ್ತೀಚೆಗೆ ಹಿಂದೂಗಳನ್ನು ಓಲೈಸಲು ನಿಂತಿದೆ. ಇಷ್ಟು ವರ್ಷ ಅಲ್ಪಸಂಖ್ಯಾತರನ್ನು ಓಲೈಸಿದ್ದಾಯ್ತು. ಆದರೆ ಅವರ ಅಭಿವೃದ್ಧಿಗೆ ಮಾತ್ರ ಏನನ್ನೂ ಮಾಡಲಿಲ್ಲ. ಮುಸ್ಲಿಂ ಬಾಂಧವರ ಸಾಮಾಜಿಕ, ಶೈಕ್ಷಣಿಕ ಅಭಿವೃದ್ಧಿಗಾಗಿ ರಚಿಸಲಾಗಿದ್ದ ಸಾಚಾರ್ ಸಮಿತಿ ನೀಡಿದ್ದ ವರದಿಯನ್ನು ಕೇಂದ್ರದಲ್ಲಿ ಸರ್ಕಾರ ಹೊಂದಿದ್ದ ಕಾಂಗ್ರೆಸ್ ಅಂಗೀಕರಿಸಿತೇ? ಇಲ್ಲವಲ್ಲ?  ಈಗ ಅಲ್ಪಸಂಖ್ಯಾತರನ್ನು ಬಿಟ್ಟು ಬಹುಸಂಖ್ಯಾತರ ಓಲೈಕೆಗಿಳಿದಿದೆ. ಧರ್ಮ, ಜಾತಿಗಳನ್ನು ಒಡೆಯುವುದು, ಓಲೈಸುವುದು ಜಾತ್ಯತೀತತೆಯೇ? ಇದು ಡೋಂಗಿತನ… ಡಾಂಬಿಕತನ.

3. ಜ್ಯಾತ್ಯತೀತತೆ ಪ್ರತಿಪಾದಕರಿಗೆ ನಿಮ್ಮ ಸರ್ಕಾರ ಕೊಟ್ಟ ರಕ್ಷಣೆ ಎಂಥದ್ದು? ಜಾತ್ಯತೀತ ಸಿದ್ಧಾಂತದ ಪ್ರತಿಪಾದಕರಾಗಿದ್ದ ಎಂ.ಎಂ.ಕಲಬುರುಗಿ ಅವರು ಹತ್ಯೆಗೀಡಾಗಿ ಎಷ್ಟು ವರ್ಷಗಳಾದವು? ಗೌರಿ ಲಂಕೇಶ್ ಹತ್ಯೆ ಕೊಲೆಗಾರರೆಲ್ಲಿ? ಈ ಕೊಲೆಗಳು ಈ ಜಾತ್ಯತೀತ ಕಾಂಗ್ರೆಸ್ ಸರ್ಕಾರದ ಅವಧಿಯಲ್ಲೇ ಅಲ್ಲವೇ ನಡೆದದ್ದ? ಇದೇನಾ ಜಾತ್ಯತೀತ ಪ್ರತಿಪಾದಕರಿಗೆ ನೀವು ಕೊಟ್ಟ ರಕ್ಷಣೆ?

4. ಸತ್ಯದ ಮೇಲೆ ಪ್ರಮಾಣ ಮಾಡಿದವರು ಸತ್ಯದ ಕೆಲಸ ಮಾಡಿದರೇ?

ಸತ್ಯದ ಮೇಲೆ ಪ್ರಮಾಣ ವಚನ ಸ್ವೀಕರಿಸಿದ ಮುಖ್ಯಮಂತ್ರಿಗಳು ಸತ್ಯವಾದ ದಾರಿಯಲ್ಲಿ ನಡೆಯಲಿಲ್ಲ ಎಂಬುದಕ್ಕೆ ಲೋಕಾಯುಕ್ತ ಸಂಸ್ಥೆಗೆ ಈಗ ಬಂದಿರುವ ದುರ್ಗತಿಯೇ ಸಾಕ್ಷಿ. ಸತ್ಯ, ನ್ಯಾಯದ ಪ್ರತೀಕವಾದ ಲೋಕಾಯುಕ್ತ ಸಂಸ್ಥೆಯ ರಕ್ತ ಮಾಂಸವನ್ನು ರಣಹದ್ದುವಿನಂತೆ ಕಿತ್ತು ತಿಂದ ಕಾಂಗ್ರೆಸ್ ಸರ್ಕಾರ ಭ್ರಷ್ಟಾಚಾರಕ್ಕೆ ಪೋಷಣೆ ನೀಡಿದೆ. ತನ್ನ ಸರ್ಕಾರದ ಭ್ರಷ್ಟಾಚಾರವನ್ನು ಲೋಕಾಯುಕ್ತ ಎಲ್ಲಿ ಬಯಲಿಗೆಳೆಯುತ್ತದೆಯೋ ಎಂಬ ಕಾರಣಕ್ಕೆ ಅದನ್ನು ನಿಶಕ್ತಗೊಳಿಸಲಾಯಿತು. ಈಗ ನಮ್ಮ ಅವಧಿಯಲ್ಲಿ ಭ್ರಷ್ಟಾಚಾರ ನಡೆದಿಲ್ಲ ಎಂದು ಬೊಬ್ಬೆ ಹಾಕುವುದು ಬೇರೆ. ಇದೊಂದು ರೀತಿ, ಕಾವಲುಗಾರನನ್ನೇ ಕೊಂದು ಸ್ವೇಚ್ಛೆಯಿಂದ ನಡೆದಂಥ ಸರ್ಕಾರ. ಕೊನೆಗೆ ಲೋಕಾಯುಕ್ತರಂಥ ನ್ಯಾಯ ಪ್ರತಿಪಾದಕರಿಗೇ ರಕ್ಷಣೆ ನೀಡದ ಈ ಕಾಂಗ್ರೆಸ್ ಸರ್ಕಾರ ರಾಜ್ಯವನ್ನು ಅರಾಜಕತೆಗೆ ತಳ್ಳಿದೆ. ಮುಖ್ಯಮಂತ್ರಿಗೆ ಮತ್ತು ಅದರ ಪಕ್ಷದ ನಾಯಕರಿಗೆ ಆತ್ಮ ಸಾಕ್ಷಿ ಎಂಬುದಿದ್ದರೆ ಲೋಕಾಯುಕ್ತ ಸಂಸ್ಥೆಯನ್ನು ದುರ್ಬಲಗೊಳಿಸದ್ದರ ಬಗ್ಗೆ ಬಹಿರಂಗವಾಗಿ ಸತ್ಯ ನುಡಿಯಲಿ. ಸತ್ಯದ ಮೇಲೆ ಪ್ರಮಾಣ ಮಾಡಿದ ಸಿದ್ದರಾಮಯ್ಯ ಅವರು ಲೋಕಾಯುಕ್ತ ವಿಚಾರದಲ್ಲಿ ಮೊದಲು ಸತ್ಯ ಹೇಳಲಿ.

5. 70 ಲಕ್ಷ ರೂಪಾಯಿಯ ವಾಚು ಖರೀದಿಸಿದ್ದೋ? ಕಿಕ್ ಬ್ಯಾಕ್ ಕೊಡುಗೆಯೋ?

ಸಮಾಜವಾದಿಯೂ, ಬಡವರ ಕಲ್ಯಾಣಕರ್ತನೂ ಎಂಬುದಾಗಿ ಬಿಂಬಿಸಿಕೊಳ್ಳುವ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಹ್ಯಾಬ್ಲೋಟ್ ಎಂಬ ದುಬಾರಿ ಕೈಗಡಿಯಾರದ ಮೋಹ ಯಾಕೆ ಬಂತು? 70 ಲಕ್ಷ ರೂಪಾಯಿ ಮೌಲ್ಯದ ಕೈಗಡಿಯಾರವನ್ನು ಮುಖ್ಯಮಂತ್ರಿ ಕೊಂಡು ಧರಿಸಿದರೋ? ಮಾಡಿಕೊಟ್ಟ ಕೆಲಸಕ್ಕೆ ಪ್ರತಿಯಾಗಿ ಪರ್ಸೆಂಟೇಜ್ ಲೆಕ್ಕದಲ್ಲಿ ಕೈಗಡಿಯಾರವನ್ನು ಕಿಕ್ ಬ್ಯಾಕ್ ಆಗಿ ಪಡೆದರೋ? ಅದರ ಬಗ್ಗೆ ಕಾಂಗ್ರೆಸ್ ಮಾತಾಡಲಿ. ಸತ್ಯದ ಮೇಲೆ ಅಧಿಕಾರಕ್ಕೆ ಬಂದ ಸರ್ಕಾರ ತನ್ನ ಅಸಲಿತನ ಪ್ರದರ್ಶಿಸಲಿ. 

6.ಸಂವಿಧಾನಕ್ಕೆ ಅಗೌರವಿಸಿದ, ಅಪಚಾರ ಬಗೆದ ಕುಟುಂಬ ಕಾಂಗ್ರೆಸ್

ಸಂವಿಧಾನದ ಆಶಯಗಳ ಬಗ್ಗೆ ಕಾಂಗ್ರೆಸ್, ಸಿದ್ದರಾಮಯ್ಯ, ರಾಹುಲ್ ಗಾಂಧಿ ಗಿಳಿಯಂತೆ ಮಾತನಾಡುತ್ತಾರೆ. ಸಂವಿಧಾನ ರಕ್ಷಣೆಗೆ ಜನ್ಮವೆತ್ತಿ ಬಂದಂತೆ ಬಿಂಬಿಸಿಕೊಳ್ಳುತ್ತಾರೆ. ತುರ್ತು ಪರಿಸ್ಥಿತಿಯಂಥ ಸಂವಿಧಾನ ವಿರೋಧಿ ಕ್ರಮವನ್ನು ಈ ದೇಶದ ಮೇಲೆ ಜರುಗಿಸಿದ್ದು ಕಾಂಗ್ರೆಸ್ ಅಲ್ಲವೇ? ರಾಹುಲ್ ಗಾಂಧಿ ಅವರ ಕುಟುಂಬವಲ್ಲವೇ? ಇದನ್ನು ಮರೆತಂತೆ ನಟಿಸುತ್ತಿರುವ ಕಾಂಗ್ರೆಸ್ ಸಂವಿಧಾನದ ಬಗ್ಗೆ ಮಾತನಾಡಿದರೆ ಕೇಳುವವರು ಯಾರು? ಈ ರಾಜ್ಯವನ್ನಾಳಿದ ಮುಖ್ಯಮಂತ್ರಿಗಳು ಏನೇನು ಮಾಡಿದರು ಎಂಬುದು ಇತಿಹಾಸ ಪುಟಗಳಲ್ಲಿ ದಾಖಲಾಗಿವೆ. ಸಿದ್ದರಾಮಯ್ಯ ಅವರ ಕುತಂತ್ರಗಳೂ ದಾಖಲಾಗುತ್ತವೆ. ಜೆಡಿಎಸ್ ಪಕ್ಷವನ್ನು ಒಡೆದ ಸಿದ್ದರಾಮಯ್ಯ, ನಮ್ಮಿಂದ ಹೊತ್ತೊಯ್ದ ಶಾಸಕರಿಂದ ರಾಜೀನಾಮೆ ಪಡೆಯದೇ ತಮ್ಮ ಪಕ್ಷಕ್ಕೆ ಅನುಕೂಲವಾಗುವ ಕೆಲಸಗಳನ್ನು ಮಾಡಿಸಿಕೊಂಡರು. ಅವರನ್ನು ರಕ್ಷಿಸಿಕೊಳ್ಳಲು ಸ್ಪೀಕರ್ ಕಚೇರಿಯನ್ನು ದುರ್ಬಳಕೆ ಮಾಡಿಕೊಂಡು ಸಂವಿಧಾನವನ್ನೇ ಅಣಕಿಸಿದರು. ಇದು ಅಸಾಂವಿಧಾನಿಕ ಕ್ರಮವಲ್ಲವೇ?  ಇದು ಇತಿಹಾಸದಲ್ಲಿ ದಾಖಲಾಗದೇ ಹೋಗುತ್ತದೆಯೇ? ಮುಂದಿನ ಪೀಳಿಗೆ ಇವರ ಬಗ್ಗೆ ಅಸಹ್ಯ ಪಡದೇ ಹೋಗುತ್ತದೆಯೇ?

7. ನಿಮ್ಮ ಮಗ್ಗುಲಲ್ಲಿದ್ದಾರೆ ನೋಡಿ ಅತ್ಯಾಚಾರಿಗಳು

ಕಟುವಾ, ಉನ್ನಾವ್ ಅತ್ಯಾಚಾರ ಪ್ರಕರಣದಲ್ಲಿ ಪ್ರಧಾನಿ ಮಾತನಾಡಬೇಕು ಎಂದು ಕಾಂಗ್ರೆಸ್ ಒತ್ತಾಯಿಸುತ್ತದೆ. ಆದರೆ, ಅತ್ಯಾಚಾರದ ಆರೋಪವನ್ನು ಹಣೆಗಂಟಿಸಿಕೊಂಡಿರುವ ಕೇರಳದ ಕೆ.ಸಿ.ವೇಣುಗೋಪಾಲ್ ತನ್ನ ಮಗ್ಗುಲಲ್ಲೇ ಇರುವುದನ್ನು, ಸಚಿವರಾಗಿದ್ದಾಗಲೇ ಅತ್ಯಾಚಾರ ಪ್ರಕರಣದಲ್ಲಿ ಸಿಕ್ಕಿಬಿದ್ದ ಎಚ್.ವೈ ಮೇಟಿ ಪ್ರಕರಣಗಳನ್ನು ಕಾಂಗ್ರೆಸ್ ಜಾಣವಾಗಿ ಮರೆಯುತ್ತದೆ. ಇಂಥ ಕಾಂಗ್ರೆಸ್ ನಿಂದ ಹೆಣ್ಣು ಮಕ್ಕಳ ರಕ್ಷಣೆ ಸಾಧ್ಯವೇ? ಇನ್ನು ಹೊಸ ವರ್ಷಾಚರಣೆ ಸಂದರ್ಭದಲ್ಲಿ ಬೆಂಗಳೂರಿನಲ್ಲಿ ಯುವತಿಯರ ಮೇಲೆ ಲೈಂಗಿಕ ದೌರ್ಜನ್ಯ ನಡೆಯಿತು. ಆಗ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಾನ್ಯ ಬೆಂಗಳೂರು ನಗರ ಅಭಿವೃದ್ಧಿ ಸಚಿವ ಜಾರ್ಜ್ ಪ್ರತಿಕ್ರಿಯಿಸಿದ್ದು ಹೇಗೆ?  "Such things happen in large cities,'' ಎಂದು.  ಈ ಮೂಲಕ ಕಾಂಗ್ರೆಸ್ ಮಹಿಳೆಯರ ರಕ್ಷಣೆಯನ್ನು ಗೇಲಿ ಮಾಡಿರಲಿಲ್ಲವೇ?  ಇದೇನಾ ಸ್ತ್ರೀ ರಕ್ಷಣೆ. ಈಗ ಕಟುವ, ಉನ್ನಾವ್ ಪ್ರಕರಣದ ಬಗ್ಗೆ ಕಾಂಗ್ರೆಸ್ ಮಾತನಾಡಲಿ.

9. ಸಾಲ ಮನ್ನಾದ ಆಸೆ ತೋರಿಸಿ ವಂಚಿಸಿಬಿಟ್ಟಿರಲ್ಲ

ರೈತರ ಸಾಲವನ್ನು ಕೇಂದ್ರ ಸರ್ಕಾರ ಮನ್ನಾ ಮಾಡಲಿ ಎಂದು ರಚ್ಚೆ ಹಿಡಿದು ಕುಳಿತ ಕಾಂಗ್ರೆಸ್ ಸರ್ಕಾರ ಕಡೆಗೆ ರಾಜ್ಯದಲ್ಲಿ ಇತ್ತಡ ಹೆಚ್ಚಾದಾಗ ಸಹಕಾರ ಸಂಘಗಳ 50000 ವರೆಗಿನ ರೈತರ ಸಾಲ ಮನ್ನಾ ಮಾಡುವುದಾಗಿ ಹೇಳಿತು. ಆದರೆ ಸರ್ಕಾರದ ಅವಧಿ ಮುಗಿದರೂ ಸಾಲ ಮನ್ನಾದ ಫಲ ಬಹುತೇಕರಿಗೆ ಸಿಗಲೇ ಇಲ್ಲ. ಇದು ತಪ್ಪಲ್ಲವೇ? ಇಡೀ ರೈತ ಸಮುದಾಯಕ್ಕೆ ಕಾಂಗ್ರೆಸ್ ಮಾಡಿದ ದ್ರೋಹ ಇದಲ್ಲವೇ?

9. ಬೃಹತ್ ಹಗರಣಗಳಿಗೆ ಸ್ಟೀಲ್ ಬ್ರಿಡ್ಜ್ ಒಂದೇ ಸಾಕು

ಸ್ಟೀಲ್ ಬ್ರಿಡ್ಜ್ ಎಂಬ ಬಹುಕೋಟಿ ಯೋಜನೆಯಲ್ಲಿ ಸರ್ಕಾರದ ಸಚಿವರು, ಅಧಿಕಾರಿಗಳು ಹಣ ಲಪಟಾಯಿಸಲು ಹೊಂಚು ಹಾಕಿದ್ದು ಎಲ್ಲರಿಗೂ ಗೊತ್ತಿರುವ ವಿಚಾರ. ಈ ವಿಚಾರ ಸರ್ಕಾರಕ್ಕೆ ಉರುಳಾಗುತ್ತಿದೆ ಎಂದು ಗೊತ್ತಾಗುತ್ತಲೇ ಸ್ಟೀಲ್ ಬ್ರಿಡ್ಜ್ ನಿರ್ಮಾಣ ನಿರ್ಧಾರದಿಂದ ಕಾಂಗ್ರೆಸ್ ಸರ್ಕಾರ ಹಿಂದೆ ಸರಿಯಿತು. ಹಾಗೆ ಹೆಜ್ಜೆ ಹಿಂದೆ ಇಡುವ ಮೂಲಕ ಯೋಜನೆಯಲ್ಲಿ ತನಗೆ ಲಾಭವಿತ್ತು ಎಂಬುದನ್ನು ಕಾಂಗ್ರೆಸ್ ಒಪ್ಪಿಕೊಂಡಿತ್ತು. ಅನ್ನವಾಗಲು ಮಡಿಕೆಯಲ್ಲಿಟ್ಟ ಅಕ್ಕಿ ಬೆಂದಿದೆಯೋ ಇಲ್ಲವೋ ಎಂದು ಹೇಳಲು ಒಂದು ಅಗುಳನ್ನು ಪರೀಕ್ಷಿಸಿದರೆ ಸಾಕು. ಇಡೀ ಮಡಕೆಯನ್ನೇ ಪರೀಕ್ಷಿಸಬೇಕಿಲ್ಲ. ಹಾಗೆಯೇ ಸರ್ಕಾರದ ಭ್ರಹ್ಮಾಂಡ ಭ್ರಷ್ಟಾಚಾರಕ್ಕೆ ಸ್ಟೀಲ್ ಬ್ರಿಡ್ಜ್ ಒಂದು ಉದಾಹರಣೆಯಷ್ಟೇ.

10. ನಿಮ್ಮಲ್ಲೇ ಗೂಂಡಾಗಳು. ನಿಮ್ಮಿಂದ ರಕ್ಷಣೆ ಸಿಕ್ಕಿದ್ದು ನಿಜವೇನಾ

ಕಾಂಗ್ರೆಸ್ ಆಡಳಿತದಲ್ಲಿ ಕರ್ನಾಟಕ ಸುಭಿಕ್ಷ, ನೆಮ್ಮದಿಯಾಗಿದೆ ಎಂದು ಅದರ ನಾಯಕರು ದೊಡ್ಡ ದನಿಯಲ್ಲಿ ಹೇಳುತ್ತಾರೆ. ಪಕ್ಷದ ಶಾಸಕರಾದ ವಿಜಯಾನಂದ ಕಾಶಪ್ಪನವರ್ ಅವರ ಪಬ್ ಗಲಾಟೆ, ಮಂತ್ರಿ ವಿನಯ್ ಕುಲಕರ್ಣಿಯಿಂದ ವೈದ್ಯರ ಮೇಲೆ ಹಲ್ಲೆ, ಮುಖ್ಯಮಂತ್ರಿ ಆಪ್ತನಿಂದ ಮೈಸೂರು ಡಿಸಿಗೇ ಬೆದರಿಕೆ, ಬೈರತಿ ಬಸವರಾಜ್ ಅವರಿಂದ ಪೊಲೀಸ್ ಪೇದೆ ಮೇಲೆ ಹಲ್ಲೆ, ಬೈರತಿ ಆಪ್ತನಿಂದ ಸರ್ಕಾರಿ ಕಚೇರಿಗೇ ಬೆಂಕಿ ಹಚ್ಚುವ ಯತ್ನ, ಶಾಸಕ ಹ್ಯಾರಿಸ್ ಪುತ್ರನ ಅಟ್ಟಹಾಸ, ಶಾಸಕ ಎಸ್.ಟಿ ಸೋಮಶೇಖರ್ ಅವರ ಬೆಂಬಲಿಗರ ನಡು ರಸ್ತೆ ರೌಡಿಸಂ, ಶಾಸಕ ಮುನಿರತ್ನರಿಂದ ಚುನಾಯಿತ ಪ್ರತಿನಿಧಿಗಳಿಗೇ ಕಿರುಕುಳ ಇತರೆ ಇತರೆ. ಇದೆಲ್ಲ ಏನು ಕಾಂಗ್ರೆಸ್ಸಿಗರೇ?

12. ಡೈರಿಯಲ್ಲಿ ಬರೆದ ಕತೆ ಏನಾಯ್ತು?

ಡೈರಿ ಗೋವಿಂದರಾಜು ತಮ್ಮ ಡೈರಿಯಲ್ಲಿ ಉಲ್ಲೇಖಿಸಿದ್ದ ಹೈಕಮಾಂಡ್ ಕಪ್ಪದ ವಿಚಾರ ಏನಾಯ್ತು? ಅಧಿಕಾರಕ್ಕೆ ಬಂದ ಮೊದಲ ಅವಧಿಯಲ್ಲೇ ಹೈಕಮಾಂಡ್ ಗೆ ತಲುಪಿಸಬೇಕಾದ್ದನ್ನು ತಲುಪಿಸಿ, ಸಾಗಿಸಬೇಕಾದನ್ನು ಸಾಗಿಸಿರುವ ನೀವು ಎರಡನೇ ಅವಧಿಯ ಅಧಿಕಾರಕ್ಕೆ ಹಪಹಪಿಸುತ್ತಿರುವುದು ಅದೇ ಸಾಗಣೆಗೇ ಅಲ್ಲವೇ? ಮುಂಬರುವ ರಾಜಸ್ಥಾನ, ಮಧ್ಯಪ್ರದೇಶ ವಿಧಾನಸಭೆ ಚುನಾವಣೆ, ಮುಂದಿನ ಲೋಕಸಭೆ ಚುನಾವಣೆಗೆ ಹಣ ಹೊಂದಿಸಿಕೊಳ್ಳಲೇ ಅಲ್ಲವೇ? ರಾಜ್ಯವನ್ನು ಕಾಂಗ್ರೆಸ್ ಎಟಿಎಂ ಮಾಡಲು ಹೊರಟಿದ್ದೀರಾ?

12.ಮಹದಾಯಿ ವಿವಾದದಲ್ಲಿ ಕಾಂಗ್ರೆಸ್ ಎ1ಆರೋಪಿ

ಮಹದಾಯಿ ವಿಚಾರದಲ್ಲಿ ಪ್ರಧಾನಿ ಮೋದಿಯನ್ನು, ಇನ್ನೊಬ್ಬರನ್ನು ಮತ್ತೊಬ್ಬರನ್ನು ದೂರುವ ಕಾಂಗ್ರೆಸ್, ವಿವಾದವನ್ನು ಬಗೆಹರಿಸಲು ಪ್ರಾಮಾಣಿಕ ಪ್ರಯತ್ನ ಮಾಡಿದೆಯೇ? “ಪತ್ರ ಬರೆದೆ ಉತ್ತರ ಕೊಡಲಿಲ್ಲ” ಎಂದು ಕೈಕಟ್ಟಿ ಕುಳಿತವರಲ್ಲವೇ ನೀವು? ಗೋವಾದ ಕಾಂಗ್ರೆಸ್ ನಾಯಕರನ್ನು ರಾಜ್ಯ ಕಾಂಗ್ರೆಸ್ ನಾಯಕರು ಒಪ್ಪಿಸುವುದಾದರೆ, ಅಲ್ಲಿನ ಬಿಜೆಪಿ ನಾಯಕರನ್ನು ನಾವು ಒಪ್ಪಿಸುತ್ತೇವೆ ಎಂದು ಬಿಜೆಪಿ ಹೇಳಿತ್ತಲ್ಲವೇ? ವಿವಾದವನ್ನು ಬಗೆಹರಿಸುವ ನಿಟ್ಟಿನಲ್ಲಿ ಪಕ್ಷ ಬೇಧ ಮರೆತು ಬಿಜೆಪಿಯವರು ನೀಡಿದ ಸೂತ್ರವನ್ನು ಪ್ರಯತ್ನಿಸಿ ನೋಡಬಹುದಿತ್ತಲ್ಲ? ಅಲ್ಲಿನ ಕಾಂಗ್ರೆಸ್ ನಾಯಕರನ್ನು, ಹೈಕಮಾಂಡ್ ಅನ್ನು ಮಹದಾಯಿ ವಿಚಾರದಲ್ಲಿ ಮಣಿಸಲು ರಾಜ್ಯ ಕಾಂಗ್ರೆಸ್ ಗೆ ಶಕ್ತಿ ಇಲ್ಲ ಎಂಬುದನ್ನು ಈ ವಿವಾದ ಜಗಜ್ಜಾಹೀರು ಮಾಡಿದೆ. ಅದಿರಲಿ, ಮಹದಾಯಿ ಹೋರಾಟಗಾರರ ಮೇಲೆ ಕಾಂಗ್ರೆಸ್ ಸರ್ಕಾರ ನಡೆಸಿದ ದೌರ್ಜನ್ಯ, ರೈತರ ಮೇಲೆ ಹಾಕಿದ ಕೇಸುಗಳನ್ನು ಜನ ಮರೆತಿಲ್ಲ. ನೆನಪಿಟ್ಟುಕೊಂಡಿದ್ದಾರೆ.

13.ಎಲ್ಲ ಸಮುದಾಯದ ದೊಡ್ಡ ನಾಯಕರನ್ನೇ ಮೂಲೆಗೆ ಸರಿಸಿ, ಅವರು ಪ್ರತಿನಿಧಿಸುವ ಸಮುದಾಯಕ್ಕೆ ದ್ರೋಹ ಬಗೆದವರು ನೀವಲ್ಲವೇ?

ದಲಿತ ಸಮುದಾಯದ ಹಿರಿಯ ನಾಯಕ ವಿ.ಶ್ರೀನಿವಾಸ ಪ್ರಸಾದ್, ಕುರುಬ ಸಮುದಾಯದ, ಸಿದ್ದರಾಮಯ್ಯರಿಗಿಂತ ಹಿರಿಯ ನಾಯಕ ಎಚ್.ವಿಶ್ವನಾಥ್, ಒಕ್ಕಲಿಗ ಸಮುದಾಯದ ಹಿರಿಯ ನಾಯಕ ಎಸ್.ಎಂ ಕೃಷ್ಣ ಹಾಗೂ ಅಂಬರೀಷ್ ಇವರನ್ನೆಲ್ಲ ಎಷ್ಟು ನಿರ್ದಾಕ್ಷಿಣ್ಯವಾಗಿ ಮುಗಿಸಿತು ಈ ಕಾಂಗ್ರೆಸ್? ಒಬ್ಬ ವ್ಯಕ್ತಿ ನಾಯಕನಾಗಿ ರೂಪುಗೊಳ್ಳಲು ಆತ ಪಡುವ ಪಡಿಪಾಟಲು, ಆತನ ಪರಿಶ್ರಮ ಕಾಂಗ್ರೆಸ್ ಗೆ ಅರ್ಥವಾಗುವುದಿಲ್ಲ. ಸಮುದಾಯಗಳನ್ನು ಒಡೆಯುವುದು, ಅದರ ನಾಯಕರನ್ನು ಮುಗಿಸುವುದೇ ಅದಕ್ಕೆ ತಿಳಿದಿರುವ ರಾಜಕಾರಣ.

14.ಉಪವಾಸ ಮಾಡಿ ಬಡವರ ಹಸಿವನ್ನೇ ಅಣಕಿಸಿದಿರಲ್ಲ

ದಲಿತ ದೌರ್ಜನ್ಯ ಕಾಯಿದೆಯನ್ನು ದುರ್ಬಲಗೊಳಿಸಬೇಕು ಎಂದು ಸುಪ್ರೀಂ ಕೋರ್ಟ್ ಹೇಳಿದಾಗ ದಲಿತ ಸಮುದಾಯ ಕೋಪಗೊಂಡಿತು. ಅವರ ಆತಂಕ ಎಂಥದ್ದು ಎಂಬುದು ಅವರ ಹೋರಾಟದ ಮೂಲಕ ಇಡೀ ದೇಶಕ್ಕೆ ಅರ್ಥವಾಗಿತ್ತು. ಅಂಥ ಸಂದರ್ಭದಲ್ಲಿ ರಾಷ್ಟ್ರೀಯ ಪಕ್ಷ ಕಾಂಗ್ರೆಸ್ ಎಲ್ಲ ನಾಯಕರೊಂದಿಗೆ ಸಂವಾದ ನಡೆಸಿ ಮುಂದಿನ ಕ್ರಮಗಳ ಕುರಿತು ಚರ್ಚಿಸಿದ್ದರೆ ಅದರ ದಲಿತ ಪರ ನಿಲುವನ್ನು ಮೆಚ್ಚಬಹುದಿತ್ತು. ಆದರೆ ಸುಪ್ರೀಂ ಕೋರ್ಟ್ ನೀಡಿದ ತೀರ್ಪಿಗೆ ಕೇಂದ್ರ ಸರ್ಕಾರವನ್ನು ಏಕಾಏಕಿ ಹೊಣೆಯನ್ನಾಗಿಸಿ ಕೇಂದ್ರದ ವಿರುದ್ಧ ಉಪವಾಸಕ್ಕೆ ಕುಳಿತರಲ್ಲ ಮಾನ್ಯ ರಾಹುಲ್ ಗಾಂಧಿ?  ಇದು ಇರಿಯುವ ಪ್ರವೃತ್ತಿಯಲ್ಲವೇ? ಮೊದಲೇ ಆತಂಕದಲ್ಲಿದ್ದ ದಲಿತರ ಗಮನವನ್ನು ತಮ್ಮತ್ತ ಸೆಳೆಯುವ ಪ್ರಯತ್ನವಲ್ಲವೇ? ಹೋಗಲಿ ಸುಪ್ರೀಂ ಕೋರ್ಟ್ ನ ಆದೇಶದ ನಂತರ ಕಾಂಗ್ರೆಸ್ ನಡೆಸಿದ ಕಾನೂನಾತ್ಮಕ ಕಾರ್ಯಕ್ರಮಗಳೇನಾದರೂ ಇವೆಯೇ? ಇಲ್ಲವಲ್ಲ? ಆ ಉಪವಾಸ ಒಂದು ಪ್ರಹಸನವಾಯಿತು. ರಾಹುಲ್ ಗಾಂಧಿ ಉಪವಾಸ ಕೂರುವ ಮೂಲಕ ಭಾರತದ ಬಡ ಜನರ ಹಸಿವೆಯನ್ನು ಅಣಕಿಸಿದರು.

15. ನಾನು ಅಮಿತ್ ಷಾ ಜತೆ ವಿಮಾನದಲ್ಲಿ ಒಟ್ಟಿಗೇ ಪ್ರಾಣಿಸಿದ ಫೋಟೊ ನಿಮ್ಮ ಬಳಿ ಇದೆಯೇ ಸಿದ್ದರಾಮಯ್ಯ ನವರೇ? ನಿಮಗೆ ನೆನಪಿನ‌ಶಕ್ತಿ ಕಡಿಮೆ ಎನಿಸುತ್ತದೆ. ಕರ್ನಾಟಕದಲ್ಲಿ ಬಿಜೆಪಿ ಸರ್ಕಾರವಿದ್ದಾಗ ಉಪಚುನಾವಣೆಗಳು ನಡೆಯುವ ಸಂದರ್ಭದಲ್ಲೇ ನೀವು ಅಂದಿನ ಬಿಜೆಪಿ ಮುಖ್ಯಮಂತ್ರಿ ಯಡಿಯೂರಪ್ಪ ಅವರೊಂದಿಗೆ ಹೆಲಿಕಾಪ್ಟರ್ ನಲ್ಲಿ ಪ್ರಯಾಣಿಸಿದ್ದನ್ನು ಇಡೀ ಕರ್ನಾಟಕ ನೋಡಿದೆ. ನೆನಪಾಯ್ತೇ?

ಕಾಂಗ್ರೆಸ್ ತನ್ನ ಬಲ ಪ್ರಯೋಗಿಸಿ ತನ್ನ ಭ್ರಷ್ಟಾಚಾರಗಳನ್ನು ಮುಚ್ಚಿ ಹಾಕಿರಬಹುದು. ಆದರೆ, ತಾನು ಅನುಸರಿಸಿದ ಅನೈತಿಕ ರಾಜಕಾರಣವನ್ನು ಮಾತ್ರ ಮುಚ್ಚಿಕೊಳ್ಳಲು ಸಾಧ್ಯವಿಲ್ಲ. ಇನ್ನಾದರೂ  ಇತರ ಪಕ್ಷಗಳ ನಿಲುವುಗಳು, ಇತರ ಪಕ್ಷಗಳ ಹುಳುಕುಗಳನ್ನು ಹುಡುಕುವುದು ಬಿಟ್ಟು, ಟೀಕೆ ಮಾಡುವುದು ಬಿಟ್ಟು ಅಭಿವೃದ್ಧಿ ಬಗ್ಗೆ ಚರ್ಚೆ ಮಾಡಲಿ. ಈ ಚುನಾವಣೆಯನ್ನು ಇನ್ನಾದರೂ ಸ್ವಚ್ಛ ಮಾರ್ಗದಲ್ಲಿ ಎದುರಿಸಿ. ವಾಚಾಳಿತನ ಬದಿಗಿಡಿ.


ಸಂಬಂಧಿತ ಟ್ಯಾಗ್ಗಳು

charge sheet JDS ವಾಚಾಳಿ ಅಭಿವೃದ್ಧಿ


ಒಂದು ಕಮೆಂಟನ್ನು ಹಾಕಿ

ಟಾಪ್ ಪ್ರತಿಕ್ರಿಯೆಗಳು


ಇಲ್ಲ ಪ್ರತಿಕ್ರಿಯೆಗಳು ಕಂಡುಬಂದಿಲ್ಲ