ಮುಂಬರುವ ವಿಧಾನಸಭೆ ಚುನಾವಣೆಗೂ ಮುನ್ನ ರಾಜ್ಯದ ಸುಮಾರು 15 ಲಕ್ಷ ಬಿಪಿಎಲ್ ಕಾರ್ಡ್​ದಾರರ ಮನಗೆಲ್ಲಲು ಸಿದ್ದರಾಮಯ್ಯ ಸರ್ಕಾರ ಹೊಸ ಕಾರ್ಯತಂತ್ರ ರೂಪಿಸಿದೆ. 

‘ಮುಖ್ಯಮಂತ್ರಿ ಅನಿಲ ಭಾಗ್ಯ’ ಹೆಸರಿನ ಹೊಸ ಯೋಜನೆಯ  ಅನುಷ್ಠಾನಕ್ಕೆ ಸಜ್ಜಾಗುತ್ತಿರುವ ರಾಜ್ಯಸರ್ಕಾರ, ಕೇಂದ್ರ ಸರ್ಕಾರದ ಇದೇ ರೀತಿಯ ಉಜ್ವಲ ಯೋಜನೆಯನ್ನೂ ಮೀರಿಸಿ ಬಂಪರ್ ಆಫರ್ ಕೊಡಲು ತೀರ್ಮಾನಿಸಿದೆ. ಇದೇ ನವೆಂಬರ್​ನಿಂದ ಅರ್ಜಿ ಆಹ್ವಾನ ಪ್ರಕ್ರಿಯೆ ಆರಂಭವಾಗಲಿದ್ದು, ಡಿಸೆಂಬರ್​ನಿಂದಲೇ ಯೋಜನೆ ಜಾರಿಗೊಳಿಸಲು ನಿರ್ಧರಿಸಲಾಗಿದೆ.

ಗ್ಯಾಸ್​ ಸ್ಟೌ, ರೆಗ್ಯುಲೇಟರ್ ಮತ್ತು ಪೈಪ್ ಸೇರಿದ ಈ ಪ್ಯಾಕೇಜ್ ಯೋಜನೆಯಡಿ ಸೌಲಭ್ಯ ಪಡೆಯುವ ಪ್ರತಿ ಫಲಾನುಭವಿಗೆ ಸರ್ಕಾರವೇ 4040 ರೂಪಾಯಿ ವೆಚ್ಚ ಮಾಡುತ್ತಿದೆ. ಈ ಯೋಜನೆ ಜಾರಿಗೆ ತರಲು ಒಟ್ಟಾರೆ 1200 ಕೋಟಿ ರೂಪಾಯಿಗಳು ಬೇಕಾಗಬಹುದೆಂದು ಅಂದಾಜಿಸಲಾಗಿದೆ.